CONMEMORACIÓN DO DÍA DA PAZ.

 

O martes, 30 de xaneiro, celebramos o Día Escolar da Non Violencia  e a Paz; por este motivo,  o noso cole énchese de pombas mensaxeiras de Paz.

A pomba, é un dos símbolos da paz, foi pintada por Picasso en 1949 para un cartel dun Congreso para a Paz.

Pero... quen foi Picasso?  - Picasso, foi un dos pintores máis recoñecido de todos os tempos. Naceu en Málaga en 1881 e puido observar os horrores de tres guerras: a Primeira Guerra Mundial, a Guerra Civil Española e a Segunda Guerra Mundial. A Guerra Civil obrigouno a fuxir a  Francia, e neste país viviu a ocupación Nazi durante a Segunda Guerra Mundial.

 Foi tal o horror que viviu e observou, que se declarou un dos maiores defensores da paz mundial. En 1949 participou nun concurso de carteis para o congreso da paz que se celebrou neste ano en París. O símbolo que escolleu para ese cartel foi unha pomba, un animal moi querido por el, xa que fora un dos primeiros animais que pintara co seu pai, e  recordáballe  momentos felices da súa infancia. A pomba representa a pureza, a inocencia e a Paz.

O seu cartel foi o vencedor, e ao longo dos anos creou outros carteis pola Paz con outras pombas, e algunhas desas pombas chegaron ao noso cole, despois de percorrer o planeta para achegarnos a diferentes lugares nos diferentes continentes onde hai guerras, desigualdades, inxustizas. Estas pombas mensaxeiras de Paz queren denunciar a través das nosas voces, as dos nenos e nenas do Isidora Riestra estes conflitos; e así, as pombas visitaron: América, África, Asia,  Europa, Oceanía a Antártida e atoparon conflitos:  guerras, tráfico de persoas, narcotráfico,  inxustizas, discriminación, desigualdade, problemas medio ambientais creados polos humanos etc.

Todas estas pombas nos enfrontan coa realidade, ás veces moi difícil de asumir. Estas pombas, pretenden que nós, a Comunidade Educativa, e sobre todo os nenos e nenas que representamos o futuro, poñamos o noso gran de area para cambiar o mundo; por ese motivo, comezaremos con algo sinxelo, creando un recanto de paz, de concordia, aberto ao diálogo, ao que podemos acudir cando queiramos ser escoitados, cando teñamos algún problema ou situación que nos coste resolver. Tamén un recanto no que propoñer solución e no que escoitar aos demais; en definitiva, un recanto para propiciar a convivencia e a PAZ.

 O 30 de xaneiro, aproveitamos tamén para facer unha carreira solidaria para facer visible unha enfermidade: a leucemia infantil.