SAÍDA PARA OBSERVAR O CAMBIO DE ESTACIÓN.

 Xa ía sendo hora de que viñera un pouquiño de bo tempo para saír de camiñata e ver os cambios na contorna coa chegada da primavera. Que ledicia poder saír e ver as prímulas, as violetas, os oxalis e as cerdeiras en flor; tamén a figueira co seus pequenos froitos, as moreiras  e os salgueiros cos gromos a punto de rebentar. 

Unha marabilla para os sentidos: o cheiro do mar, o son das pombas, o tacto das cortizas das árbores e a vista da illa de Tambo, impasible ao lonxe. Tamén puidemos observar unha pequena garceta intentando pillar algún peixe ou cangrexo, atenta sempre aos nosos movementos.

ONZA E LEO, OS NOVOS MEMBROS DA FAMILIA DE THIAGO.

 Thiago conta con dous novos amigos e membros da súa familia, Onza e Leo, dous soles que iluminan a cara do seu dono cada vez que os nomea.  

Thiago levaba uns días falándonos deles e das experiencias que compartían, polo que lle pedímos permiso aos seus pais, Silvia e Wallace, para que nos fixeran unha visita. 

Onza e leo son dous cans que foron adoptados na Canceira de Poio.  Moito mérito ten esta adopción,  xa que son cans moi maiores e cos seus achaques, e tamén polo seu aspecto de cans perigosos; pero para nada, como sempre, os cans que se adoptan nunha protectora son  os máis fieis e mellores amigos; levan pasado tanto... que por un chisco de cariño dan a vida enteira. 

Quedamos encantados pola súa tranquilidade e polo ben que recibiron a aqueles nenos e nenas que se quixeron acercar a darlles agarimo. 

Esta visita serviunos para darnos conta de que unha mascota transfórmase nun membro máis da familia, que precisa de coidados, de cariño e de moita responsabilidade; puntos que hai que ter en conta e pensar ben para que logo non acaben nunha canceira ou nun refuxio de animais. Tamén falamos do importante que é adoptar en lugar de mercar, as canceiras están cheas de animais que buscan con desesperación o cariño unha familia. 

Se alguén quere estar en contacto con algún destes animais pero non pode levalos para a súa casa, pode ir de forma voluntaria a sacalos a pasear, as persoas encargadas das protectoras quedarán encantadas.