RECOMENDACIÓNS PARA O VERÁN. FICHAS E CARTILLAS.

Comezo felicitando ao alumnado de 6º de Educación Infantil por ter superado con éxito a súa primeira etapa educativa. No relativo a propostas para verán o ideal é que xoguen, fagan actividade física, adquiran responsabilidades tales como: colaborar nas tarefas de casa, participando na elaboración dalgunha receita, ordenando o seu cuarto, axudando no coidado dalgunha mascota ou planta etc. Todo isto fomentaría a súa autonomía persoal e melloraría a súa autoestima ao sentirse útil e responsable.

Tamén sería importante que pasara tempo de calidade coa súa familia e/ou amigos/as, evitando o uso abusivo de pantallas; favorecendo a adquisición de habilidades sociais e de linguaxe.

Unha das actividades que se debería conservar é a do momento de lectura antes de ir a durmir. O conto é un recurso moi importante, propicia un momento relaxado  antes de durmir, fomenta a atención, a comprensión, o enriquecemento da linguaxe e sobre todo do vocabulario; ten un efecto catártico, permite analizar outros puntos de vista da realidade e en moitos casos salientar problemas emocionais que vive a través dos personaxes. Aqueles nenos/as que comezan coa lectura poden ir lendo un pouquiño cada día. Tamén poden facer diferentes actividades a partir do conto:  debuxar escenas do conto, analizar os personaxes, cambiar o final do conto etc.

Os xogos de mesa son outro dos recursos destacados para o verán: a oca, parchís, bingos, crebacabezas, cartas; todo o que implique contar e razoar é ideal.

A elaboración dun diario de verán onde se vaia anotando a data de cada día e o aspecto máis salientable dese día, se se acompaña de debuxos e/ou imaxes mellor. Un diario implica traballar lecto-escritura, aspectos espazo-temporais e emocionais.

Crear un libro de receitas de verán con algunhas das receitas que axudaron a elaborar. Traballamos, pesos, tamaños, cantidades, formas, cores etc.

Participar na elaboración da lista da compra, non ditando as letras senón pronunciando os sons das letras paras traballar a conciencia fonolóxica.

Outras das actividades propostas para o verán son as manualidades: recortar, resgar papel, pintar, amasar etc. Estas actividades desenvolven a creatividade e a motricidade fina, imprescindible para escribir.

Para aquelas familias que queiran manter unha pequena rutina de fichas para traballar lecto-escritura ou aspectos lóxico-matemáticos, poderán acceder ás carpetas que se subirán ao blog. Tamén se incorporarán unhas cartillas de lectura.

Só me queda desexarvos un bo verán, vémonos en setembro!!😘😘

FICHAS LECTO E MATES